Baðlónin eru ekki hraðbanki ríkissjóðs.

Ríkisstjórnin ætlar að hækka skatt á baðlón um fjóra milljarða með því að færa baðlón úr 11% virðisaukaskatti í 24%. Skatthlutfallið hækkar um 118%. Þetta er ekki hófleg breyting heldur sértæk skattárás á eina af verðmætustu útflutningsvörum þjóðarinnar.

‍Með þessu sýnir ríkisstjórnin furðulegt skilningsleysi á gangverki hagkerfisins og mikilvægi sterkra fyrirtækja fyrir almenning.. Hún virðist vera með einfalt Excel skjal sem reiknar aðeins krónurnar sem ríkisstjórnin vonast til að innheimta. Hún reiknar ekki með viðbrögðum ferðamanna, minni eftirspurn, færri fjárfestingum, vetrarlokunum eða störfunum sem tapast. Samtök ferðaþjónustunnar hafa einmitt bent á að vegna verðnæmrar eftirspurnar geti hækkunin skilað ríkissjóði minni tekjum en ráðgert er.

‍Baðlónin eru ekki einhver óþarfur lúxus. Þau nýta íslenskan jarðhita, náttúru og hugvit til að skapa gjaldeyri og heilsársstörf. Um 54% erlendra ferðamanna heimsóttu baðlón árið 2024, samkvæmt umsögn Bláa lónsins. Þessir gestir kaupa líka gistingu, mat, samgöngur og aðra þjónustu.

‍ Sem fyrr verður skaðinn mestur á landsbyggðinni. Enda er ekkert baðlón í Reykjavík og eingöngu eitt af þeim þrettán baðlónum sem hér eru talin upp á höfuðborgarsvæðinu.  

Baðlónin eru ein af stoðum atvinnulífsins í landsbyggðunum.

Í Norðausturkjördæmi eru 70% gestanna yfir vetrarmánuðina Íslendingar. Það er augljóst að verðhækkun mun fyrst og fremst bíta yfir viðkvæmustu vetrarmánuðina. Tímabilið sem við Íslendingar höfum varið áratugum í byggja upp rekstur á. Líklegt verður að teljast að sérstaklega dragi úr aðsókn yfir þann tímann eftir 118% hækkun á virðisaukaskatti. Vök Baths á Austurlandi telja að tapmánuðum geti fjölgað úr fimm í sjö og að loka þurfi yfir erfiðasta vetrartímann. Í þessu tiltekna kjördæmi eru fjögur baðlón. Fjárfestingin á bak við þessa verðmætasköpun nemur um 20 milljörðum. Þar starfa um 160 manns. Baðlónin eru mikilvægur segull fyrir ferðamenn og sterkur þáttur í atvinnuöryggi svæðisins

Sama mynd blasir við víða um land. Í Laugarási á Suðurlandi hefur nýtt baðlón skapað 61 ársstarf. Nýtt Baðlón í Hveragerði sem kostaði um fjóra milljarða og opnaði fyrir rúmri viku skapar störf fyrir annan eins fjölda og Hvammsvík er stærsti atvinnurekandinn í Kjósarhreppi. Þarna verður skaðinn mestur.

Þessi árás á atvinnulíf landsbyggðarinnar er ekki skattur á fáein baðlón. Þetta er skattur á starfsfólk, birgja, veitingastaði, gististaði og sveitarfélög um allt land. Síðast en ekki síst er þetta atlaga gegn íbúum þessara svæða sem í áratugi hafa leitað að tækifærum.

Ekki batnar þetta þegar horft er til þess að hér eru leikreglurnar settar eftir á. Ferðaþjónusta er seld allt að tveimur árum fram í tímann og milljarðafjárfestingar hafa verið ákveðnar á grundvelli gildandi skattkerfis. Fyrirtækin geta ekki endursamið gamla samninga þótt ríkisstjórnin ákveði skyndilega að tvöfalda skattinn.

Það er réttlætanlegt að innheimta sanngjarnt gjald á fjölsóttum ferðamannastöðum ef tekjurnar renna aftur í náttúruvernd og innviði. En það er annað mál en að nota eina mikilvægustu útflutningsgrein þjóðarinnar sem hraðbanka ríkissjóðs.

Ríkisstjórnin á að draga þessa skattahækkun til baka.

Baðlónin skapa gjaldeyri, störf og verðmæti um allt land. Þau eru ekki vandamál sem þarf að skattleggja.

Þau eru árangur sem þarf að verja.