Tökum höndum saman og fegrum bæinn - 1.700 tré og plöntur sett niður í fyrra.

Það eru fátt sem gleður augað meira en litadýrð í beðum og snyrtilegur bær sem tekur á móti okkur með brosi – og einmitt það stefnum við á nú þegar vorið læðist inn með lengri dögum og hlýrri sólargeislum.

Fallegt umhverfi er hluti af sjálfsmynd velmegandi bæja.

Plöntuhátíð sumarsins heldur áfram

Eins og bæjarbúar þekkja þá hefur mikil áhersla verið lögð á að gera bæinn okkar enn fallegri og líflegri með gróðusetningu og öðrum umhverfisaðgerðum. Í fyrra settum við niður um 1.700 plöntur víðsvegar um Þorlákshöfn – mest meðfram Ölfusbrautinni – og þær fara nú að taka við sér aftur. Í sumar ætlum við að einbeita okkur að því að gera enn betur við eldri beðin: hreinsa, snyrta og gróðursetja þar sem vantar. Þá verður einnig horft til þess að bæta gróðri við á nýjum svæðum víðsvegar um bæinn.

Sigríður Embla kemur með kraft og lit

Til að gera þetta mögulegt höfum við fengið til liðs við okkur frábæran garðyrkjufræðing, Sigríði Emblu Heiðmarsdóttur, sem hefur nú hafið störf og er byrjuð að leggja drög að sumrinu með okkur. Hún mun sjá um skipulagningu, hönnun og framkvæmd garðyrkjuverkefna í traustu samstarfi við Davíð Halldórsson umhverfisstjóra sem fer með yfirumsjón þessara mála.

Blómaskrúfa í miðri umferð

Við ætlum líka að skella smá gleði og sköpun í hringtorgið – þar hefur okkar góða fólk nú hannað nýtt beð í laginu eins og skipaskrúfu! Vegagerðin hefur þegar samþykkt hugmyndina og við hlökkum til að sjá það blómstra.

Það er við hæfi að torgið við aðkomuna á hafnarbænum móti skipsskrúfu með gróðri.

Þar við hlið verður svo grasið grænt alla daga, þar sem orðið „VELKOMIN“ verður úr gerfigrasi í möninni – smá leikgleði og hlýtt ávarp til allra sem leggja leið sína í gegnum bæinn.

Aðkoma að þéttbýli skiptir máli, og þar með að þeir sem fari þar um upplifi sig velkomin.

Tökum höndum saman – hver íbúi skiptir máli

Við hvetjum ykkur öll – íbúa, fyrirtæki og stofnanir – til að taka þátt!
Lítill snúningur með hrífu eða sópur á gangstétt getur gert kraftaverk. Hvort sem það er að snyrta blómaker, losa sig við vetrarrykið eða snyrta grasflötina – öll hjálp skiptir máli.

Við sköpum saman fallegan og lifandi bæ

Vorið er hér – og við fögnum því með því að fegra umhverfið.
Tökum höndum saman og gerum bæinn okkar enn hlýlegri, snyrtilegri og blómlegri!